બનાસકાંઠા જીલ્લાની આર્થીક નગરી ડીસા શહેરમાં ઘણા સમયથી રખડતા ઢોરોની સમસ્યાથી લોકો હેરાન પરેશાન થઇ ચુક્યા છે. રખડતા દ્વારા દિનપ્રતિદિન રાહદારીઓ અને વાહનચાલકોને અડફેટે લેતા શહેરીજનો મુશ્કેલીનો સામનો કરી રહ્યા છે. છેલ્લા 72 કલ્લાકમાંજ રખડતા પશુઓએ અડફેટે લેતા એક બાળકી સહિત આઠ લોકોને ગંભીર ઈચ્છા પહોંચી હતી. જેથી લોકોમાં ભારે રોષ ફેલાયો હતો. આ મામલે અગાઉ પણ ડીસા શહેરમાં અનેક વખત આંદોલન થયા છે. અનેક વખત લોકોએ તંત્રને ફરિયાદો પણ કરી હતી. નાયબ કલેક્ટરે જાહેરમા પશુઓને ઘાસચારો નાખવા પર પ્રતિબંધ ફરમાવતું જાહેરનામું બહાર પાડ્યું હતુ. તેમ છતાં પણ રખડતા પશુઓની સમસ્યા ઘટવાને બદલે વધી રહી છે. જ્યારે જાગૃત નાગરિક એ રખડતા પશુઓની સમસ્યાને ઉકેલવામાં નિષ્ફળ ગયેલા તંત્ર અને રખડતા પશુઓને નિયંત્રિત કરવા માટે જે વિભાગની જવાબદારી હોય તે વિભાગના અધિકારીઓ અને કર્મચારીઓ સામે ડીસા શહેર ઉત્તર અને દક્ષિણ પોલીસ મથકમાં લેખિત ફરિયાદ કરી હતી. જો પોલીસ દ્વારા કાર્યવાહી કરવામાં પીછે હઠ થશે તો હાઈકોર્ટમાં પીટીશન દાખલ કરવાની પણ તૈયારી દર્શાવી હતી. આ અંગે ફરિયાદીએ જણાવ્યું હતું કે , શહેરમાં વારંવાર રખડતા પશુઓ લોકોને ઇજા પહોંચાડી રહ્યા છે. જે અંગે વારંવાર રજૂઆત કરવા છતાં પણ  તંત્ર અને કર્મચારીઓ દ્વારા કોઈ જ પગલાં લેવાયા નથી. જેથી અમે નિષ્ફળતંત્ર સામે ફરિયાદ કરી હતી. ઉલ્લેખનિય છે કે હાઇકોર્ટ દ્વારા વારંવાર ટકોર કરી છે. તેમ છતાં પણ તંત્ર આ બાબતે કોઈ જ ગંભીરતા દાખવતી નથી. જેના કારણે કેટલી વખત રખડતા ઢોરો લોકોને ઇજા પહોંચાડે છે. અને તેમનો જીવ પણ જોખમમાં મુકાય છે. જે ભારતીય ફોજદારી ધારાની કલમ 289 મુજબ ગુનો બને છે.