નર્મદા જિલ્લાના તમામ તાલુકાઓના આંગણવાડી કેન્દ્રો પર બાળકોને સાથે રાખી કાર્યકરો દ્વારા વૃક્ષારોપણ કરાયું
દર વર્ષે તા.૫મી જૂને વિશ્વ પર્યાવરણ દિવસની ઊજવણી કરવામાં આવે છે. નાનપણથી જ બાળકોમાં પર્યાવરણ પ્રત્યે લગાવ-પ્રેમ જાગે, તેઓ પ્રકૃતિ સાથે સુમેળ સાધતા શીખે અને બાળપણથી જ પર્યાવરણની જાળવણીના બિજ તેમના મનમાં અંકુરિત થાય તેવા ભાવ સાથે મહિલા અને બાળ વિકાસ વિભાગના સંકલિત બાળ વિકાસ વિભાગ દ્વારા “વિશ્વ પર્યાવરણ દિન” ની ઉજવણી પર્વે આંગણવાડીના કેન્દ્રો પર વિવિધ પ્રવૃતિઓ હાથ ધરવાનું નક્કી કરવામાં આવ્યું છે. જેના પગલે નર્મદા જિલ્લાની તમામ તાલુકાની આંગણવાડીઓમાં આ કાર્ય કરવામાં આવ્યું હતું.
