લીંબડી તાલુકાના નળકાંઠા વિસ્તારના ગામની પરિણીતા સાથે પરાલી ગામના માવજી ગગુભાઈ પાંચાણીએ પ્રેમ સબંધ બાંધ્યો હતો. પ્રેમ સબંધમાં આંધળી બનેલી પરિણીતાએ માવજી પાચાણી સાથે શરીર સંબંધ બાંધ્યો હતો. બન્ને અંગત પળો માણી રહ્યા હતા તેનો માવજીએ ફોનમાં વીડિયો બનાવી લીધો હતો. પરિણીતાએ છએક માસથી માવજી સાથે પ્રેમ સંબંધ તોડી નાખ્યો હતો. પ્રેમ સબંધ તૂટતા માવજી ઉશ્કેરાઈ ગયો હતો. પરિણીતાની કુંટુંબ અને સમાજમાં બદનામી થાય તેવા આશ્રયથી માવજીએ પ્રેમીકા સાથે માણેલી અંગત પળોનો વીડિયો સોશિયલ મીડિયામાં ફરતો કરી દીધો હતો.આ વાતની જાણ થતાં પરિણીતાએ પાણશીણા પોલીસ મથકે માવજી પાચાણી સામે ફરિયાદ નોંધાવી હતી. જેની તપાસ સીપીઆઈ એમ.એચ. પુવાર ચલાવી રહ્યા હતા. સીપીઆઈ ટીમ સાથે પાણશીણા પીએસઆઈ પી.આર.મોડ, મહાવીરસિંહ ઝાલા સહિતનાએ આરોપીને શોધવા પોલીસ ટીમે ચક્રો ગતિમાન કર્યા હતા. લીંબડી હાઈ-વે પર આવેલી હોટલના રૂમમાંથી ઝડપી પાડ્યો હતો. આરોપી માવજી પાચાણીએ ગુનાની કબૂલાત કરી હતી.