লোকবাদ্যৰ পৰা পশ্চিমীয়া সংগীতৰ বাদ্যলৈকে । কি বজাব নাজানে কিশোৰজনে । ১৬ বিধ বাদ্য বজোৱাত পাৰ্গত তেওঁ । গোলাঘাটৰ এই প্ৰতিভাবান কিশোৰ জনৰ সন্দৰ্ভত চাওক এই প্ৰতিবেদন । চৌদিশে নেতিবাচক খবৰৰ মাজতে এটা উৎসাহজনক বাতৰি । আনে যোৱা বাটেৰে নোযোৱা লৰাজন । এও গোলাঘাটৰ ভাৰ্গৱ ভৰদ্বাজ কটকী । একাদশ শ্ৰেণীৰ ছাত্ৰ ভাৰ্গৱে অধ্যয়নৰ সমান্তৰালকৈ কৰি গৈছে সংস্কৃতিৰ নিৰলস সাধনা । অসমীয়া লোক বাদ্য বজোৱাত পাৰ্গত ভাৰ্গৱ । ঢোল, খোলৰ পৰা আৰম্ভ কৰি পেপা ,বাঁহি , দোতোৰা, টোকাৰী, নেগেৰা,মেলদিকা, কাহন, আদি কৰি মুঠ ১৬ বিধ বাদ্য বজোৱাত পাৰ্গত । গোলাঘাট বিবেকানন্দ বিদ্যালয়ৰ ছাত্ৰ ভাৰ্গবে নিজৰ পঢ়া-শুনাৰ সমান্তৰালকৈ চলাই গৈছে এই সংস্কৃতিৰ এই সাধনা । গোলাঘাট বিপিন ফুকন নগৰৰ বাবুল কটকী আৰু দিপ্তী কটকীৰ একমাত্ৰ সন্তান ভাৰ্গৱে এই বাদ্য সমুহ ৰাজ্যৰ বিভিন্ন প্ৰান্তৰ লগতে ৰাজ্যৰ বাহিৰত উৰিষ্যা, ডেৰাদুন, মথুৰা আদিতো বজাই প্ৰশংসা বুটলিবলৈ সক্ষম হৈছে । শেহতীয়াভাৱে ৰাজ্য চৰকাৰৰ উদ্যোগত হ'বলগীয়া বিহুৰ বিশ্ব ৰেকৰ্ডৰ অনুস্থানত ঢোল বজাব ভাৰ্গৱে ।