બનાસકાંઠાની પાલનપુર કોર્ટમાં ફરજ બજાવતા મદદનીશ સરકારી વકીલ રૂ. 1,00,000 ની લાંચ લેતાં એ.સી.બી.ના રંગેહાથ ઝડપાતાં ચકચાર મચી ગઇ છે. કોર્ટ કેસમાં આરોપીને મદદ કરવાના અવેજ પેટે લાંચની રકમની માંગણી કરાઇ હતી. જે ફરિયાદી આપવા માંગતાં ન હોય એ.સી.બી.માં ફરિયાદ કરતાં એ.સી.બી.એ ટ્રેપ ગોઠવી પાલનપુર સેશન્સ કોર્ટના ઇન્ચાર્જ સરકારી વકીલ નૈલેશ જોષીને રૂ. 1,00,000 ની લાંચ લેતાં ઝડપી પાડ્યા હતા.

આ કામના ફરિયાદીના દીકરા વિરુદ્ધ ફરિયાદીની પુત્રવધુ દ્વારા શારીરિક માનસિક ત્રાસ અંગેની ફરિયાદ પાલનપુર શહેર પશ્ચિમ પોલીસ સ્ટેશનમાં કરી હતી.જેમાં ના.પાલનપુર બીજા એડીશનલ ચીફ જયુડીશિયલ મેજીસ્ટ્રેટનાઓની કોર્ટમાં કેસ ચાલી જતાં ફરિયાદીના દીકરાને સજા થયેલ હતી. જે હુકમની સામે આ ફરિયાદીના પુત્રએ બનાસકાંઠા ડીસ્ટ્રીકટ એન્ડ સેશન્સ કોર્ટ પાલનપુરમાં અપિલ દાખલ કરાવેલ હતી. જે કામે મદદરૂપ કરવાની કાર્યવાહી કરવાના અવેજ પેટે ઇન્ચાર્જ જીલ્લા સરકારી વકીલ નૈલેશ જોષીએ રૂ. 1,00,000 ની લાંચ માંગી હતી.

ઇન્ચાર્જ સરકારી વકીલને ફરિયાદી લાંચ આપવા માંગતાં ન હોય તેઓએ એ.સી.બી.નો સંપર્ક કરી ફરિયાદ આપી હતી. એ.સી.બી.એ લાંચના છટકાનું આયોજન કર્યું હતું. જેમાં આરોપી પાલનપુરના જોરાવર પેલેસ રોડ પર આવેલા વિરાટ કોમ્પલેક્સમાં ચાની લારી પાસે લાંચની રકમ સ્વીકારતાં એ.સી.બી.એ રંગેહાથ ઝડપી પાડ્યા હતા. આરોપીને એ.સી.બી.એ ડીટેઇન કરી આગળની કાર્યવાહી હાથ ધરી છે.

પાલનપુરમાં સફળ ટ્રેપની કામગીરી એ.સી.બી. અમદાવાદ એકમના મદદનીશ નિયામક કે.બી.ચુડાસમાના સુપરવિઝન હેઠળ ખેડા એ.સી.બી.ના પી.આઇ.વી.આર.વસાવા અને તેમની ટીમ દ્વારા કરાઇ હતી.