કોંગ્રેસ દ્વારા દેશવ્યાપી આંદોલન, મોંધવારી-બેરોજગારીના મુદ્દે વિરોધ
તમામ નેતાઓ અને સાંસદો કાળા કપડાં પહેરીને રસ્તા પર ઉતર્યા હતા
કોંગ્રેસના અધ્યક્ષ સોનિયા ગાંધી, રાહુલ ગાંધી સહિતના નેતા જોડાયા

નવી દિલ્હીઃ કોંગ્રેસે આજે બેરોજગારી અને મોંઘવારી વિરુદ્ધ દેશવ્યાપી પ્રદર્શન યોજ્યું હતું. પ્રદર્શનને લઈને દિલ્હીમાં સુરક્ષા વ્યવસ્થા ખૂબ જ મજબૂત કરવામાં આવી છે. આ દરમિયાન કોંગ્રેસના અધ્યક્ષ સોનિયા ગાંધી, રાહુલ ગાંધી સહિત અન્ય પાર્ટી સાંસદો પણ કાળા કપડાં (Congress leader wears black clothes and protest) પહેરીને સંસદ પહોંચ્યા હતા. કોંગ્રેસના નેતા પ્રિયંકા ગાંધી પણ મોંઘવારી અને જીએસટીના વિરોધમાં જોડાયા હતા. વિરોધ કરતા કરતા જ્યારે તેઓ રાયસીના હિલ્સ તરફ આગળ વધ્યા તો પોલીસે તેઓને રોક્યા હતા. એ પછી તેઓ જમીન પર બેસી ગયા હતા અને તાળીઓ પાડી પાડીને વિરોધ (Protest by Congress) કરવા લાગ્યા હતા.

મોંઘવારી-બેરોજગારી મુદ્દે વિરોધ પ્રદર્શન
મોંઘવારી અને બેરોજગારીને લઈને કોંગ્રેસ દ્વારા દેશવ્યાપી પ્રદર્શન યોજવામાં આવ્યું છે. આ પ્રદર્શન દરમિયાન સોનિયા ગાંધી, રાહુલ ગાંધી, મલ્લિકાર્જુન ખડગે સહિત તમામ કોંગ્રેસના દિગ્ગજ આજે અલગ જ અંદાજમાં જોવા મળ્યા હતા. તમામ નેતાઓએ વિરોધના ભાગરુરે કાળા કપડાં પહેર્યા હતા અને સંસદ પહોંચ્યા હતા. મોંઘવારી વિરુદ્ધ પ્રદર્શન કરતી વખતે રાહુલ ગાંધી પાર્ટી અધ્યક્ષ સોનિયા ગાંધી સાથે નજરે પડ્યા હતા. કોંગ્રેસ નેતા રાહુલ ગાંધી આ વિરોધ પ્રદર્શન દરમિયાન સંપૂર્ણ કાળા કપડામાં નજરે પડ્યા હતા. આ પહેલાં રાહુલ ગાંધીએ પ્રેસ કોન્ફરન્સ યોજીને કેન્દ્ર સરકાર પર સામાન્ય લોકોને લઈને આંખ આડા કાન કરવાનો આરોપ લગાવ્યો હતો.

કોંગ્રેસના નેતા થયા એકજૂટ
કોંગ્રેસના દેશવ્યાપી પ્રદર્શન દરમિયાન કોંગ્રેસ અધ્યક્ષ સોનિયા ગાંધી, રાહુલ ગાંધી, મલ્લિકાર્જુન ખડગે સહિતના નેતાઓ કાળા કપડા અને કાળી પાઘડી બાંધેલા જોવા મળ્યા હતા. સંસદ પરિસરમાં મલ્લિકાર્જુન ખડગેની સાથે કોંગ્રેસના સાંસદ કે.સી. વેણુગોપાલ, રંજીત રંજન સહિત અન્ય સાંસદો પણ કાળા કપડાંમાં નજરે પડ્યા હતા. મોંઘવારીના વિરોધમાં કાળા કપડાં પહેરીને સાંસદોની વચ્ચે રાજ્યસભામાં વિપક્ષના નેતા કાળા કલરના કુર્તાની સાથે કાળી પાઘડી પહેરેલા જોવા મળ્યા હતા.

લોકોના ભારણ અને ડરની ફરિયાદ માટે અવાજ ઉઠાવ્યો
કોંગ્રેસ સાંસદ અને વરિષ્ઠ નેતા પી.ચિદંબરમે કહ્યું કે, આ વિરોધ મોંઘવારી અને અગ્નિપથને લઈને છે. ભાવ વધારો તમામ લોકોને પ્રભાવિત કરે છે. એક રાજકીય દળ રુપે હું અને અન્ય નેતાઓ લોકોને વધી રહેલા ભારણ અને ડરની ફરિયાદોને અવાજ આપવા માટે તૈયાર છીએ. અમે એ જ કરી રહ્યા છીએ. કોંગ્રેસના સાંસદ રાજીવ શુક્લાએ કહ્યું કે, અમે રાષ્ટ્રપતિ ભવન સુધી આ માર્ચ યોજવાનો પ્રયાસ કરી રહ્યા છીએ, પરંતુ પોલીસ અમને રોકી રહી છે. પોલીસ અમને વિરોધ કરવા માટે મંજૂરી આપી રહી નથી. તમામ સાંસદો અટકાયત માટે પણ તૈયાર છે. અમે આગળ વધવાનો પ્રયાસ કરી રહ્યા છીએ. અમે જનતાના પ્રશ્નો મુદ્દે લડી રહ્યા છીએ.

આ લડાઈ લાંબી છે, લડતા રહીશું
કોંગ્રેસ નેતા સલમાન ખુર્શીદે કહ્યું કે, આ દેશની જનતા પર જે પ્રહાર થઈ રહ્યા છે, એના માટે અમે લડી રહ્યા છીએ. આ લડાઈ લાંબી છે અને અમે લડતા રહીશું. બેરોજગારી અને મોંઘવારી અમારો મુખ્ય મુદ્દો છે.

ઈડીએ કરી મલ્લિકાર્જુન ખડગેની પૂછપરછ
નેશનલ હેરાલ્ડ મુદ્દે ઈડીના અધિકારીઓએ યંગ ઈન્ડિયન પ્રાઈવેટ લિમિટેડના કાર્યાલયમાં તપાસ હાથ ધરી હતી. આ દરમિયાન કોંગ્રેસના વરિષ્ઠ નેતા મલ્લિકાર્જુન ખડકેની પણ પૂછપરછ કરી હતી. મલ્લિકાર્જુન વાયઆઈના મુખ્ય અધિકારી ઈડના અધિકારીઓ દ્વારા પૂછપરછ દરમિયાન સહયોગ આપ્યો હતો.