গুৱাহাটী প্ৰেছ ক্লাবত চৰাইদেউ বাতৰি কাকতৰ দ্বাদশ বাৰ্ষিক বৰ্ষপূৰ্তী অনুষ্ঠান সম্পন্ন

 চৰাইদেউ জিলাৰ পৰা প্ৰকাশিত এক মাত্ৰ পষেকীয়া বাতৰি কাকত 'চৰাইদেউ বাতৰি' ৰ দ্বাদশ বাৰ্ষিক বৰ্ষপূৰ্তী অনুষ্ঠান আৰু বঁটা প্ৰদান অনুষ্ঠান  গুৱাহাটী প্ৰেছ ক্লাবত আজি অনুষ্ঠিত কৰা হয়। চৰাইদেউ জিলাৰ প্ৰাক্তন উপায়ুক্ত বিবেকানন্দ ফুকনৰ সঞ্চালনত অনুষ্ঠিত  সম্বৰ্ধনা সভাত উদ্বোধনী ভাষন প্ৰদান কৰে চৰাইদেউ বাতৰি কাকতৰ মুখ্য উপদেষ্টা তথা সোনাৰি সমষ্টিৰ মাননীয় বিধায়ক ধৰ্মেশ্বৰ কোঁৱৰ ডাঙৰীয়াই। মুখ্য সম্পাদক মৃদুল কুমাৰ চাহুৱে আত ধৰা সভাখনত বিশিষ্ট অতিথি হিচাপে উপস্থিত থাকে ইন্ডিয়ান এক্সপ্ৰেছ কাকতৰ জেষ্ঠ প্ৰশাসনিক বিষয়া চৰাইদেউৰ  নিবাসী বিপুল কলিতা, আৰ্টফেডৰ উপাধ্যক্ষ প্ৰহ্লাদ গোৱালা, মুখ্য বক্তা জীতু শৰ্মা ৰাজখোৱা । উক্ত সভাতে অসমৰ জলসম্পদ বিভাগৰ মন্ত্ৰী পিযুস হাজৰিকা দেৱক "কৰ্মভূষণ ২০২২ " , বিশিষ্ট সাংবাদিক ৰাজদ্বীপ বাইলুং বৰুৱাক যুৱ সাংবাদিকতা বঁটা, মেঘালয়ৰ ইউনিভাৰ্ছিটি চাইন্স এন্ড টেকন'লজীৰ উপাচাৰ্য ম: মহবুল হক দেৱক শিক্ষা ৰত্ন বঁটা, নাগালেণ্ড ইউনিভাৰ্ছিটি ৰ অৱসৰপ্ৰাপ্ত উপাচাৰ্য ড০ বলিন কোঁৱৰ প্ৰজ্ঞাৰ সাধক বঁটা,ৰাজীৱ কুমাৰ মাহাত্বক সমাজ সেৱিকা বীনা ৰানী ভুমিজ সোঁৱৰণী বঁটা প্ৰদান কৰা হয়। তাৰোপৰি এই সভাতে দৈনন্দিন কাকতৰ কাৰ্যবাহী সম্পাদক ডিম্পুল চূতীয়া, অসম আদিত্য কাকতৰ সহ সম্পাদক হৰেণ সোনোৱাল, অসম ৰাজ্যিক সাংবাদিক সন্থাৰ সম্পাদক ৰাতুল বড়া, চৰাইদেউৰ জনসংযোগ কৰ্মচাৰী ভাস্কৰ বৰদলৈ, আহোম য়ুথ ফৰামৰ সভাপতি বিশ্বজিৎ গগৈ, এছিয়া বুক অফ ৰেকৰ্ডছত অন্তৰ্ভুক্ত কিশোৰ  লেখক আয়ুস্মান কলিতা, গুজৰাটত অনুষ্ঠিত ৰাষ্ট্ৰীয় গেমছত অংশগ্ৰহণ গ্ৰহন কৰি পদক পাবলৈ সক্ষম হোৱা বীমা বড়া আৰু অন্যন্যা শইকয়ালৈ বিশেষ সম্বৰ্ধনা জ্ঞাপন কৰে। গুৱাহাটী প্ৰেছ ক্লাবত অনুষ্ঠিত এই গাম্ভীৰ্য পূৰ্ণ দ্বাদশ বাৰ্ষিক বৰ্ষপূৰ্তী অনুষ্ঠানত চৰাইদেউ প্ৰকাশৰ লগত জড়িত ব্যক্তি সকলৰ উপৰিও ভালে সংখ্যক গন্য মান্য ব্যক্তি উপস্থিত আছিল।