औरंगाबाद : गजबजलेल्या कमळापूर परिसरात गावठी कट्ट्याने गोळी झाडून तलवारीने वार करत एकाला जखमी केल्याची घटना चार दिवसांपूर्वी घडली . गावठी कट्टा व तलवार हातात घेऊन सोशल मीडियावर रिल्स बनवणारा आरोपी पोलिसांना सापडत नव्हता . यासंदर्भात  १६ ऑक्टोबर रोजी ' पोलिसांच्या खबऱ्यांचे नेटवर्क कुचकामी ' या मथळ्याखाली वृत्त प्रकाशित केले होते . यानंतर दुसऱ्याच दिवशी १७ ऑक्टोबर रोजी गुन्हे शाखेच्या पथकाने तलवारीसह एकाला जेरबंद केले . पोलिस शिपाई अमोल शिंदे यांना त्यांच्या खबऱ्याकडून वाळूज एमआयडीसी पोलिस ठाणे हद्दीतील वडगाव कोल्हाटी , सलामपुरेनगरात राहणाऱ्या सुनील सहदेव पवार ( २२ ) या अारोपीकडे तलवार असल्याची माहिती मिळाली . त्यावरून पोलिस कर्मचारी सय्यद मुजीब , गजानन मांटे , अमोल शिंदे , कैलास काकडे , राजाराम डाखुरे यांनी पवारच्या घराची झडती घेतली असता कपाटाखाली ठेवलेली तलवार सापडली . याप्रकरणी एमआयडीसी वाळूज ठाण्यात गुन्हा दाखल करण्यात आला