ঐতিহ্যমণ্ডিত আমলখি দেওশালত টাই আহোম সাংস্কৃতিক পৰিষদৰ উদ্যোগত আৰু ৰাইজৰ সহযোগত আজি "খ্যেক-লাই-খাও-মী আই জঙ লাও ঙী জঙ কাম" অৰ্থাৎ লখিমী আদৰা উৎসৱ আয়োজন কৰা হয়। শস্যৰ শ্ৰীবৃদ্ধি কামনাৰে উদযাপন কৰা হয় এই অনুষ্ঠানৰ । উল্লেখ্য যে, চাও লুং ছুকাফাই এই মুলুকত ৰাজ্য প্রতিষ্ঠা কৰাৰ পাছৰে পৰা ম্যুঙ দুন ছুন খামত শস্যৰ আয়ুস বৃদ্ধিৰ বাবে পূজা অৰ্চনা কৰা ব্যৱস্থা হয় । এই পৰম্পৰা অনুষ্ঠানত টাই আহোমসকলৰ উপাস্য জলশক্তি ‘খাও খাম'ৰ পৰা খন্ – আয়ুস বিচাৰি পূজা-পাতল কৰি আহিছে পূৰ্বৰে পৰা । মন কৰিবলগীয়া যে টাই আহোমসকলৰ প্ৰধান খেতিৰ শস্য হ'ল–ধান (লখিমী) । এই ধানৰ শ্ৰীবৃদ্ধি হোৱাৰ লগতে সোণালী গুটিৰে নদন-বদন হৈ ভঁৰালত ওপচি পৰাৰ কামনা কৰি আহোমসকলে উপাসনা কৰি আহিছে । বছৰৰ আহিন মাহত ধান গছ সঁজাল ধৰি গেঁওলি হোৱাৰ সময় হয় , সেয়েহে এই মাহত – লাই খাও মী আই জঙ লাও ঙী জঙ খাম উৎসৱ অনুষ্ঠান পতাৰ নিয়ম পূৰ্বৰে পৰা চলি আহিছে । টাই আহোমসকলৰ ধান খেতিয়েই মূল জীৱিকাৰ শক্তি হলেও অন্যান্য শস্যসমূহৰো শক্তি বৃদ্ধি বা আয়ুস বৃদ্ধি সকলোৰে কামনা কৰে । এই আয়ুস বৃদ্ধি কামনা পৰম্পৰাকে সাৰোগত কৰি আহোম ৰজাদিনীয়া জাগ্ৰত ঐতিহাসিক দেওশালখনত এই অনুষ্ঠানৰ আয়োজন কৰা হয়। অনুষ্ঠানত ৰাজ্যৰ কেবিনেট মন্ত্ৰী যোগেন মহনৰ লগতে বহু কেইগৰাকী বিশিষ্ট অতিথি উপস্থিত থাকে।