रत्नागिरी : जिल्हा कृषी अधिक्षक कार्यालयाच्या जिल्हा गुणवत्ता नियंत्रण विभागातर्फे जिल्ह्यातील ५ कृषी सेवा केंद्रांचे परवाने केले रद्द तर पाचल मधील एका कृषी सेवा केंद्राचे तीन परवाने कायमस्वरुपी रद्द करण्यात आले आहेत.
रत्नागिरी जिल्हा कृषी अधिक्षक कार्यालय जिल्हा गुणवत्ता नियंत्रण विभागाच्यावतीने खते, किटकनाशके, बियाणे विक्री करणा-या कृषी सेवा केंद्रांमध्ये काही त्रुटी आढळून आल्याने त्यांचे परवाने रद्द करण्यात आले आहेत. जिल्ह्यातील संगमेश्वर मधील १, वाटद - खंडाळा मधील १, रत्नागिरीतील १, गोळप मधील १ व दापोली मधील १ अशा पाच कृषी सेवा केंद्रांचे बियाणे विक्री परवाने रद्द करण्यात आले आहेत. तसेच पाचल मधील एका कृषी सेवा केंद्राचे ३ परवाने कायमस्वरुपीच रद्द करण्यात आला आहे.
स्टॉक रजिस्टर मेंटेन न ठेवणे, विक्री बिलांवर शेतक-यांच्या स्वाक्षऱ्या नसणे, किंवा विस्तृत बिले दिलेली नसणे, शिल्लक साठा आणि दरपत्रक डिस्प्ले न करणे या प्रकारातील कारणांमुळे ही कारवाई करण्यात आली आहे. परवाने निलंबित केलेल्या कृषी सेवा केंद्रांनी कागदपत्रांची पूर्तता केल्यास व आवश्यक त्या त्रुटी पुर्ण केल्यास निलंबन आदेश रद्द करुन परत परवाने सुरु करुन दिले जातील, असे जिल्हा कृषी अधिक्षक कार्यालयाकडून सांगण्यात आले.
