চিলাপথাৰৰ চিচিবৰগাঁৱত আকস্মিকভাৱে মৃত্যু হোৱা CRPF ৰ জোৱান বিক্ৰমজিত চুতীয়াৰ আজি সম্পূৰ্ণ ৰাষ্ট্ৰীয় মৰ্যাদাৰে অন্তষ্টিক্ৰিয়া সম্পন্ন 

ধেমাজিৰ চিচিবৰগাঁৱৰ সমীপৰ টকৌবাৰী গাঁৱৰ কেন্দ্ৰীয় সংৰক্ষিত আৰক্ষী বাহিনীৰ জোৱান বিক্ৰমজিত চুতীয়াৰ কালি দুপৰীয়া আকস্মিকভাৱে মৃত্যু হোৱাৰ ঘটনাই সমগ্ৰ অঞ্চলটোতে শোকৰ ছাঁ পেলাইছে । জানিব পৰা অনুসৰি কাশ্মীৰত কৰ্মৰত হৈ থকা CRPF ৰ 163 বেটেলিয়ানৰ জোৱানজনে ২৫ ছেপ্তেম্বৰত ছুটিত ঘৰলৈ আহিছিল । কালি দুপৰীয়া ঘৰত কাম কৰি থকা অৱস্থাতে হঠাতে বুকুৰ বিষ অনুভৱ কৰে । ততাতৈয়াকৈ বিক্ৰমজিতক পৰিয়ালৰ লোকে চিচিৎসালয়লৈ নিয়ে যদিও চিকিৎসালয়ৰ পথতেই মৃত্যুক সাৱটি লয় । আজি দুপৰীয়া মৰণোত্তৰ পৰীক্ষাৰ পিছত ঘৰলৈ অনা হয় বিক্ৰমজিতৰ নাশ্বৰ দেহ । মৃত যোৱানজনৰ নশ্বৰ দেহ ঘৰ আহি পোৱাৰ পিছতেই এক শোকাকূল পৰিবেশৰ সৃষ্টি হয় । বিক্ৰমজিতৰ নশ্বৰ দেহত সম্পূৰ্ণ ৰাষ্ট্ৰীয় মৰ্য্যদাৰে শ্ৰদ্ধাঞ্জলি জ্ঞাপন কৰে ডিব্ৰুগড়ৰ পৰা অহা CRPF ৰ DIG ৰাজীৱ ৰঞ্জন, CRPF ৰ 171 বেটেলিয়নৰ দ্বিতীয় অধিনায়ক সঞ্জয় কুমাৰ সিংহ, সহকাৰী অধিনায়ক সঞ্জয় কুমাৰ ঝা, ধেমাজি জিলা আৰক্ষী প্ৰশাসনৰ উপ আৰক্ষী অধীক্ষক আবুটানি দলে, CRPF ৰ ইন্সপেক্টৰ অৰবিন্দ কুমাৰ তিৱাৰী, এছ আই সুনীল বড়ো, চিচিবৰগাঁও আৰক্ষী চকীৰ ভাৰপ্ৰাপ্ত বিষয়া কুলেশজ্যোতি ভূঞাসহ পৰিয়ালৰ লোকসকল ,আত্মীয়-স্বজন আৰু গুণমুগ্ধ সকলে । ইয়াৰ পিছতে শ শ লোকৰ উপস্থিতিত CRPF ৰ জোৱানসকলে এক শোকাকূল পৰিবেশৰ মাজত সম্পূৰ্ণ ৰাষ্ট্ৰীয় মৰ্যাদাৰে বিক্ৰমজিতৰ শেষকৃত্য সম্পন্ন কৰে ।