ওডালগুৰি জিলাৰ কলাইগাঁৱৰ নিকটৱৰ্তী বননগৰী উচ্চ মাধ্যমিক বিদ্যালয়ৰ সহকাৰী শিক্ষক নলিনী কান্ত ডেকাই নিজৰ শিক্ষণ ইউটিউব চেনেলৰ জৰিয়তে উপাৰ্জন কৰা ধনৰ ২৫,৫৫৫.০০ টকা আজি মুখ্যমন্ত্ৰী সাহায্য পুঁজিলৈ আগবঢ়ায় ৷ আজি(৩১ জুলাই) শিক্ষক ডেকাই মুখ্যমন্ত্ৰী ড° হিমন্ত বিশ্ব শৰ্মাক সাক্ষাৎ কৰি তেওঁৰ হাতত ২৫,৫৫৫.০০ টকা মুখ্যমন্ত্ৰী সাহায্য পুঁজিলৈ আগবঢ়ায় ৷ উল্লেখ্য যে, জিলাখনৰ ২ নং কলাইগাঁৱৰ প্ৰয়াত সীতাৰাম ডেকা আৰু নিৰলা ডেকাৰ শিক্ষক পুত্ৰ নলিনী কান্ত ডেকাই ২০১৯ চনত ক’ভিড মহামাৰীৰ সময়ত ছাত্ৰ-ছাত্ৰীৰ অনলাইন পাঠদানত সহায়ক হোৱাকৈ ইউটিউবত নিজৰ নামত এটা শিক্ষণ চেনেল খুলি সময়োপযোগী আৰু ছাত্ৰ-ছাত্ৰীৰ পাঠ ভিত্তিক বিভিন্ন শিক্ষণ ভিডিঅ’ৰে ছাত্ৰ-ছাত্ৰীৰ উপকাৰ সাধন কৰি আহিছে ৷ এনেদৰে চেনেলটোত ছাত্ৰ-ছাত্ৰীৱে দেখুওৱা আগ্ৰহৰ ফলত ইউটিউবৰ জৰিয়তে শিক্ষক ডেকাই ধন উপাৰ্জন কৰিবলৈ আৰম্ভ কৰে ৷ সেয়ে ছাত্ৰ-ছাত্ৰীক উপকাৰ সাধনৰ বাবে প্ৰস্তুত ককা পাঠভিত্তিক বিষয় সম্প্ৰচাৰ জৰিয়তে চেনেলৰ উপাৰ্জিত ধনৰ ৬০ শতাংশ শিক্ষক নলিনী কান্ত ডেকাই ছাত্ৰ-ছাত্ৰীৰ উপকাৰৰ বাবে খৰচ কৰি অহিছে । তেওঁ বৃহত্তৰ অঞ্চলটোৰ বিভিন্ন বিদ্যালয়লৈ গৈ ছাত্ৰ-ছাত্ৰীৰ বাবে বহী, কিতাপ, কম্পাছ, কলম আদি প্ৰদান কৰাৰ উপৰিও বিদ্যালয়ৰ পুথিভঁৰাললৈ কিতাপ আদিও প্ৰদান কৰিছে । তেওঁ বৰ্তমানলৈ অঞ্চলটোৰ সমলাবড়ি প্ৰথমিক বিদ্যালয়, ৰণথলী সমবায় প্ৰথমিক বিদ্যালয়, দৰঙ্গীপাৰা প্ৰথমিক বিদ্যালয়, বননগৰী প্ৰাথমিক বিদ্যালয় (দুবাৰ), বৰপুখুৰী প্ৰথমিক বিদ্যালয়লৈ শিক্ষামূলক সামগ্ৰী প্ৰদান কৰিছে । ইউটিউবৰ পৰা একেৰাহে সপ্তমবাৰলৈ উপাৰ্জন কৰা ধনৰ ২৫,৫৫৫.০০ টকা মুখ্যমন্ত্ৰী সাহায্য পুঁজিলৈ আগবঢ়াই তেওঁৰ মহানুভৱতাৰ পৰিচয় দিয়ে ৷