औरंगाबाद : वेशांतर करून मुले पळवणारी टोळी आपल्या भागात आली आहे , अशी अफवा पसरल्याने शुक्रवारी जवाहरनगर परिसरात एका मेकअप आर्टिस्टला जमावाने बेदम मारहाण केली . पोलिसांनी वेळीच घटनास्थळी धाव घेत तरुणाची सुटका केली . शुक्रवारी संध्याकाळी पाच वाजता विश्वभारती कॉलनीत एका शाळेसमोर पालक एकत्र आले . त्याच वेळी एक जण महिलांचे कपडे परिधान करून तोंडाला स्कार्फ बांधून शाळेसमोरून जात होता . ही बाब वॉचमनच्या लक्षात आली . तेव्हा तेथील लोकांनी त्याचा पाठलाग करून पकडले असता तो पुरुष असल्याचे लक्षात आले . तो मुले पळवण्याचा टोळीतील असल्याचा संशय आल्याने जमावाने त्याला मारहाण करण्यास सुरुवात केली . घटनेची माहिती मिळताच जवाहरनगर पोलिसांनी धाव घेत त्याची सुटका केली .