बीड/ वडवणी - धावत्या स्विफ्ट गाडीमध्ये अचानक स्फोट होऊन आग लागण्याची घटना रविवारी घडली. गाडीने अचानक पेट घेतल्यामुळे एकच नागरिकांची तारांबळ उडाली. मात्र यावेळी घटनास्थळी उपस्थित असलेल्या वडवणी येथील शिवसैनिकांनी जीव धोक्यात घालून गाडीला लागलेली आग विझवली. त्यामुळे मोठा अनर्थ टळला. ही घटना वडवणी शहरातील संभाजी महाराज चौक परिरसरात असलेल्या मातोश्री हॉटेलसमोर घडली आहे.
गेवराई तालुक्यातील जातेगाव येथील गाडी बीड-परळी रोडवरून जात असताना वडवणीतील मातोश्री हॉटेलजवळ या स्विफ्ट गाडीचा स्फोट झाला. आणि अचानक आग लागली. समोर हॉटेलमध्ये बसलेले शिवसेनेच्या कार्यकर्त्यानी ही घटना पाहताच त्यांनी आपला जीव धोक्यात घालून गाडीला लागलेली आग विझवली. गाडीतील वायरिंग मध्ये दोष असल्याने गाडीने पेट घेतला असल्याचा प्राथमिक अंदाज वर्तवण्यात आला आहे. मात्र शिवसैनिकांच्या सतर्कतेमुळे मोठा अनर्थ टळल्याने परिसरात त्यांचे कौतुक होत आहे.
