কেন্দ্ৰীয় কেবিনেটে কালি ভাৰতৰ পাচঁখন ৰাজ্যৰ ১২ টা জনগোষ্ঠীক জনজাতিৰ মৰ্যদা প্ৰদান কৰিলে , কিন্তু অতি পৰিতাপৰ বিষয় যে অসমৰ ছয় জনগোষ্ঠীৰ যি দীৰ্ঘদিনীয়া জনজাতিকৰণৰ দাবী আজি পৰ্যন্ত পুৰণ নকৰি কেন্দ্ৰীয় আৰু ৰাজ্য চৰকাৰে ছয় জনগোষ্ঠীক প্ৰতাৰণা কৰিছে। ইয়াক লৈ আজি চিলাপথাৰ নগৰৰ মাজ মজিয়াত সদৌ টাই আহোম ছাত্ৰ সন্থাৰ কৰ্মী সকলে প্ৰধানমন্ত্ৰী নৰেন্দ্ৰ মোডী আৰু অসমৰ মুখ্যমন্ত্ৰী হিমন্ত বিশ্ব শৰ্মাৰ পুত্তলিকা দাহ কৰি উত্তাল প্ৰতিবাদ সাব্যস্ত কৰে। এই ছয় জনগোষ্ঠীক জনজাতিকৰণৰ কাৰণে ২০১৬ চনৰ ফেব্ৰুৱাৰী মাহত গঠণ কৰা মডেলিটি কমিটিয়ে তিনিমাহৰ ভিতৰত প্ৰতিবেদন দাখিল কৰি ছয় জনগোষ্ঠীৰ জনজাতিকৰণত আগুৱাই নিয়া কেৱল নিৰ্বাচনৰ ইচ্ছুহে আছিল নেকি বুলি তেখেতলোকে প্ৰশ্ন তোলে ! জনজাতিকৰণৰ বাবে সম্পূৰ্ণ বৈশিষ্ট থকা পিছটো জনজাতিকৰণ প্ৰদান নকৰি বাৰে বাৰে এই ছয় জনগোষ্ঠীক প্ৰতাৰণা কৰিছে বুলি মন্তব্য প্ৰকাশ কৰে আটাছুৰ কৰ্মীসকলে । আজি এই প্ৰতিবাদ স্থলীৰ পৰাই অসম আৰু কেন্দ্ৰীয় চৰকাৰক অনাগত দিনত যদিহে এই ছয় জনগোষ্ঠীক‌ জনজাতিকৰণ প্ৰদান নকৰে তেনে গণতান্ত্ৰিকভাৱে তীব্ৰ আন্দোলন গঢ়ি তোলাৰ হুংকাৰ প্ৰদান কৰে।