সোণাৰিৰ শালকাঠনি চাহ বাগিচাত সোমবাৰে গণ প্ৰহাৰত এগৰাকী লোকৰ মৃত্যু হোৱাত সাপেখাতি আৰক্ষীয়ে নিশাই আটক কৰে খগেন তাঁতী আৰু ৰমেশ তাঁতী নামৰ দুগৰাকী শ্ৰমিকক। ইয়াৰ পাছতেই দুয়োগৰাকী লোকক মুকলিৰ দাবীত চাহ বাগিচাৰ উত্তেজিত শ্ৰমিকে সাপেখাতি আৰক্ষী থানাৰ সন্মূখত অৱস্থান কৰে যদিও আৰক্ষীয়ে নিয়ন্ত্ৰণলৈ আনে সামগ্ৰিক পৰিস্থিতি। উত্তেজিত শ্ৰমিকে আটকাধীন লোক দুজনক আৰক্ষীয়ে মুকলি কৰি নিদিলে সকলো শ্ৰমিককে আটক কৰিবলৈ দাবী জনায় যদিও আৰক্ষীয়ে উত্তেজিত শ্ৰমিকক বুজাই পৰিস্থিতি নিয়ন্ত্ৰণ কৰে। আনহাতে ইয়াৰ পাছতেই গণ প্ৰহাৰত এজন লোক মৃত্যু হোৱা ঘটনাৰ লগত জড়িত থকা বুলি অভিযোগ উত্থাপন হোৱা আন দুজন লোকেও আৰক্ষী থানাত আত্মসমৰ্পন কৰাত উত্তেজনাময় পৰিস্থিতিৰ শাম কাটে। আত্মসমৰ্পন কৰা লোক দুজনৰ নাম বিমল তাঁতী আৰু দেৱানন্দ তাঁতী। সম্প্ৰতি আটাইকেইজনৰ বিৰুদ্ধে সাপেখাতী আৰক্ষী থানাত গোচৰ ৰুজু কৰাৰ লগতে জেল হাজোতলৈ প্ৰেৰণ কৰিছে।