কালি কামৰূপ জিলাৰ বাইহাটা-কমলপুৰ জ্যেষ্ঠ নাগৰিক সন্মিলনৰ পঞ্চম প্ৰতিষ্ঠা দিৱস উদযাপন কৰা হয় । সন্মিলনৰ কাৰ্যকৰী সভাপতি লোহিত চন্দ্ৰ ডেকা আৰু সম্পাদক অৰুণ চন্দ্ৰ মজুমদাৰে অৱগত কৰামতে, দিনযোৰা কাৰ্যক্ৰমণিকাৰে বাইহাটা শিৱ মন্দিৰ প্ৰাঙ্গনত অনুষ্ঠিত উক্ত পঞ্চম প্ৰতিষ্ঠা দিৱসৰ কাৰ্যসূচী অনুসৰি পুৱা ৯ বজাত পতাকা উত্তোলন কৰে বাইহাটা-কমলপুৰ জ্যেষ্ঠ নাগৰিক সন্মিলনৰ সভাপতি ৰমেন চৌধুৰীয়ে ৷ ৯-৩০ বজাত গছপুলি ৰোপণ কৰে সন্মিলনৰ জ্যেষ্ঠ সদস্য খগেন মালি আৰু প্ৰফুল্ল দাসে ৷ ১০ বজাত বন্ত্বি প্ৰজ্জ্বলন কৰে কামৰূপ জিলা জ্যেষ্ঠ নাগৰিক সন্মিলনৰ সভাপতি নৰেন শৰ্মাই ৷ ১০-৩০ বজাত বিদ্যালয়ৰ ছাত্ৰ ছাত্ৰী সকলৰ মাজত কবিতা আবৃত্তি,সাধুকথা আৰু আকস্মিক বক্তৃতা প্ৰতিযোগিতা অনুষ্ঠিত কৰা হয়। প্ৰতিযোগিতা সমূহৰ পিছতে প্ৰতিষ্ঠা দিৱসৰ লগত সংগতি ৰাখি এখনি মুকলি সভাৰ আয়োজন কৰা হয় ৷ কমলপুৰ উচ্চতৰ মাধ্যমিক বিদ্যালয়ৰ প্ৰাক্তন অধ্যক্ষ তথা বাইহাটা-কমলপুৰ জ্যেষ্ঠ নাগৰিক সন্মিলনৰ সভাপতি ৰমেন চৌধুৰীৰ সভাপতিত্বত অনুষ্ঠিত এই মুকলি সভাৰ কাৰ্যসূচীত "শিশুৰ শিক্ষাৰ অধিকাৰ আৰু সুৰক্ষা" শীৰ্ষক এখনি আলোচনা চক্ৰও অনুষ্ঠিত হৈ যায় ৷ এই আলোচনা চক্ৰত আলোচক হিচাবে উপস্থিত থাকে আৰ্য কলেজৰ অৱসৰী অধ্যাপক ড° জয়কান্ত শৰ্মা,কামৰূপ জিলা জ্যেষ্ঠ নাগৰিক সন্মিলনৰ সাধাৰণ সম্পাদক বীৰেন্দ্ৰ নাথ শৰ্মা আৰু কমলপুৰ খণ্ড প্ৰাথমিক স্বাস্থ্যকেন্দ্ৰৰ মহকুমা স্বাস্থ্য বিষয়া ডা° ডিম্বেশ্বৰ শৰ্মা ৷