মৰিধল মহাবিদ্যালয়ত দিনজোৰা কাৰ্যসূচীৰে ৰাজনীতি বিজ্ঞান বিভাগৰ প্ৰাক্তন ছাত্ৰ-ছাত্ৰীৰ সমাৰোহ সম্পন্ন

ধেমাজি জিলাৰ অন্যতম উচ্চ শিক্ষাৰ প্ৰতিষ্ঠান মৰিধল মহাবিদ্যালয়ত আজি দিনজোৰা কাৰ্যসূচীৰে মহাবিদ্যালয়খনৰ ৰাজনীতি বিজ্ঞান বিভাগৰ প্ৰাক্তন ছাত্ৰ-ছাত্ৰীৰ সমাৰোহখনি অনুষ্ঠিত কৰা হয় । পুৱা বৃক্ষৰোপনেৰে আৰম্ভ হয় সমাৰোহৰ কাৰ্যসূচী । ইয়াৰ পিছতে মহাবিদ্যালয়ৰ ৰাজনীতি বিজ্ঞান বিভাগৰ ছাত্র-ছাত্ৰীসকলে সমাৰোহ উপলক্ষে প্ৰস্তুত কৰি উলিওৱা প্ৰাচীৰ পত্ৰিকা জ্যোতিৰ্ময় উন্মোচন কৰে মহাবিদ্যালয়খনৰ অধ্যক্ষ ডঃ দ্বীপেন শইকীয়া আৰু ৰাজনীতি বিজ্ঞান বিভাগৰ মূৰব্বী অধ্যাপক গুণাভি গগৈয়ে । ইয়াৰ পিছতে প্ৰাক্তন ছাত্ৰ চিৰঞ্জীৱ শইকীয়াৰ পৰিচালনাত আৰম্ভ হয় শিক্ষক-ছাত্ৰৰ অন্তৰংগ আলাপ অনুষ্ঠান । অনুষ্ঠানত প্ৰাক্তন ছাত্ৰ-ছাত্ৰীসকলৰ দ্বাৰা মহাবিদ্যালয়ৰ শিক্ষক-শিক্ষয়িত্ৰী সকলক ফুলাম গামোচা আৰু স্মাৰকেৰে সম্বৰ্ধনা জনোৱা হয় । বিভাগৰ প্ৰাক্তন তথা বৰ্তমানৰ ছাত্ৰ-ছাত্ৰী সকলে পৰিবেশন কৰা বিভিন্ন সাংস্কৃতিক অনুষ্ঠানে সজীৱ কৰি তোলে সমগ্ৰ পৰিবেশ । অনুষ্ঠানত দুই শতাধিক প্ৰাক্তন ছাত্ৰ-ছাত্ৰীয়ে অংশগ্ৰহণ কৰে।