এন এফ ৰে'লৱে মজদুৰ ইউনিয়নৰ সদ্য নিৰ্বাচিত কেন্দ্ৰীয় কমিটিৰ সমূহ বিষয়বৱীয়াক আজি বঙাইগাঁৱত উষ্ণ সম্বৰ্ধনা জনোৱা হয় ।

বঙাইগাঁও বিজি শাখাৰ উদ্যোগত অনুষ্ঠিত সম্বৰ্ধণা সভাৰ আঁত ধৰে ফণীধৰ দাসে । সম্বৰ্ধনা গ্ৰহণ কৰি এন এফ ৰে'লৱে মজদুৰ ইউনিয়নৰ সভাপতি দিলীপ কুমাৰ চক্ৰৱৰ্তীয়ে কয়, উত্তৰ -পূৱ সীমান্ত ৰে'লত মজদুৰ ইউনিয়নৰ এক সুকীয়া স্থান আছে । ৰে'ল শ্ৰমিকৰ স্বাৰ্থত সংগ্ৰাম কৰি আমাৰ নিষ্ঠাবান সতীৰ্থই প্ৰাণ আহুতি দিয়াৰ নজিৰো আছে ।এনে সাহসী আৰু নিঃস্বাৰ্থ আত্ম বলিদানৰ দৃষ্টান্তৰে মজদুৰ ইউনিয়নৰ ইতিহাস সমৃদ্ধ ।সেই কাৰণে "মজদুৰ ইউনিয়ন" হেজাৰ হেজাৰ ৰে'ল শ্ৰমিকৰ স্বাৰ্থজড়িত সংগ্ৰাম নাইবা আদৰ্শৰ পৰা কেতিয়াও ফালৰি কাটি আহিব নোৱাৰে । সেই উদ্দেশ্য সৰোগত কৰিয়েই আমি নতুন কমিটিৰ সদস্য সকলে আমাৰ সাংগাঠনিক শক্তি অধিক মজদুত আৰু সম্প্ৰসাৰিত কৰিব লাগিব । প্ৰতিজন ৰে'ল শ্ৰমিকৰ মনত মজদুৰ ইউনিয়নৰ ভাৱমূৰ্তি, ইয়াৰ সংগ্ৰামী শক্তিৰ বীজ ৰোপন কৰিব লাগিব । সাধাৰণ সম্পাদক আশীষ বিশ্বাসে কয়, এন এফ ৰে'লৱে মজদুৰ ইউনিয়নে সদায়ে শ্ৰমিকৰ স্বাৰ্থত কাম কৰি আহিছে আৰু নৱ নিৰ্বাচিত কমিটিখনেও শ্ৰমিকৰ স্বাৰ্থৰ হকে কাম কৰি যাব । এইক্ষেত্ৰত কোনোক্ষেত্ৰতে আপোচ কৰা ন'হব । অল ইণ্ডিয়া ৰে'লৱে মেনচ ফেডাৰেচনৰ উত্তৰ-পূৱৰ সম্পাদক পীযুষ চক্ৰৱৰ্তীয়ে নৱ নিৰ্বাচিত কমিটিৰ সদস্য সকলক অভিনন্দন জনাই কয় যে এ আই আৰ এফ এ সদায়ে এন এফ ৰে'লৱে মজদুৰ ইউনিয়নৰ সৈতে সহযোগিতা কৰি যাব । তেওঁ ঐতিহাসিক ৰে'ল আন্দোলনৰ বঙাইগাঁওৰ ছহীদ পৰেশ সান্যালৰ স্মৃতি ৰোমন্থন কৰে । চক্ৰৱৰ্তীয়ে বৰ্তমান পৰিস্থিতিত আগন্তুক সময়ত ইউনিয়নৰ কেন্দ্ৰীয় নেতৃবৃন্দৰ ওপৰত গধুৰ দায়িত্ব আহি পৰিছে বুলি কয় ।সম্বৰ্ধনা সভাৰ অন্তত ইউনিয়নৰ নিউ বঙাইগাওঁ বিজি শাখাৰ সম্পাদক তথা কেন্দ্ৰীয় কমিটিৰ উপ সভাপতি মৃণাল শীলে উপস্থিত আটাইকে কৃতজ্ঞতা জ্ঞাপন কৰে ।