মাজুলীৰ কলা-সংস্কৃতি ফটো ব্যৱহাৰ কৰি বেপাৰ চলাই থকা ডিব্ৰুগড়ৰ "আদিত্য ৰেচিডেঞ্চি " নামৰ হোটেলৰ কাণ্ড দেখি স্তম্ভিত হৈ পৰিছে মাজুলীবাসী। হোটেল খনত মাজুলীৰ নামাকৰণ কৰা আৰু সত্ৰীয়া কলা সংস্কৃতিৰ ফটো সম্বলিত ফটো থকা প্লাষ্টিকৰ মেট ব্যৱহাৰ কৰে খোৱাৰ টেবুলত। খোৱা বস্তুৰ জোঠা কৰি পেলোৱা উক্ত ফটো সামাজিক মাধ্যম যোগেদি প্ৰচাৰ হোৱাৰ পিছত ৰাইজৰ মাজত তীব্ৰ প্ৰতিক্ৰিয়াৰ সৃষ্টি হৈছে। মহাপুৰুষ গুৰু দুজনে সৃষ্টি কৰা অমৰ কলা সংস্কৃতিৰ ঐতিহ্য পৰম্পৰা ৰক্ষা কৰি যি সময়ত মাজুলীৰ সত্ৰানুষ্ঠান সমূহে বিশ্ব দৰবাৰত প্ৰতিষ্ঠা কৰিবলৈ চেষ্টা অব্যাহত ৰাখিছে, যি সময়ত মাজুলীৰ কলা সংস্কৃতি দৰ্শনৰ বাবে দৈনিক হাজাৰ হাজাৰ দেশী বিদেশী পৰ্যটকৰ আগমন ঘটে, সেই সময়ত সস্তীয়া বেপাৰ বাণিজ্যৰ বাবেমাজুলীৰ কলা সংস্কৃতিৰ ফটো ব্যৱহাৰ কৰা কাৰ্য গৰিহণা যোগ্য বুলি তীব্ৰ সমালোচনা কৰিছে মাজুলীৰ দল সংগঠন আৰু সচেতন ৰাইজে। মাজুলীৰ এগৰাকী সচেতন যুৱক ননী গোপাল দত্তই উক্তঘটনাক পোহৰ লৈ অনাৰ পিছত হোটেলৰ মালিক পক্ষৰ এনে ধৰণৰ অবিবেচক কাণ্ড ক গৰিহণা দিয়াৰ লগতে অনতিপলমে তেনে কাৰ্য বন্ধ কৰিবলৈ দাবী জনাই ছে মাজুলীবাসীয়ে। মাজুলী জিলা যুৱ ছাত্ৰ পৰিষদৰ সভাপতি মুনিন্দ্ৰ ভূঞা, জিলা সাংবাদিক সন্থাৰ সভাপতি ডিবাকৰ শইকীয়া, সম্পাদক দীপু বৰা, জিলা ছাত্র সন্থাৰ সভাপতি অজিত হাজৰিকা, জিলা সাহিত্য সভাৰ সভাপতি ৰণজিৎ কুমাৰ ভূঞা, মাজুলী সুৰক্ষা মঞ্চৰ সম্পাদক জগত হাজৰিকা, কৃষক মুক্তি সংগ্ৰাম সমিতিৰ সম্পাদক পবন্ত শইকীয়া আদিয়ে অতি সোনকালে ৰেষ্টুৰেন্টৰ টেবুলত খোৱা পাতৰ তলত পাৰি দিয়া মাজুলী শীৰ্ষক (মাজুলীৰ ঐতিহ্যৰ ছবিৰে) মেটৰ দৰে ব্যৱহাৰ কৰা ছবি সমূহ আতৰ কৰিবলৈ কতৃপক্ষক দাবী জনাইছে। লগতে মাজুলীৰ ঐতিহ্যক খোৱা পাতৰ তলত স্থান দি বেপাৰ নকৰিবলৈ সকিয়াই দিয়াৰ সমান্তৰাল ভাৱে, মন মৰ্যাদা সহকাৰে ৱালত অংকন কৰিবলৈ দাবী কৰে। অন্যথা মাজুলী দল সংগঠনৰ যৌথ প্ৰচেষ্টাত আইনী ব্যৱস্থা গ্ৰহণ কৰিব লৈ বাধ্য থাকিব বুলি সকিয়াই দিয়ে।