নতুন দিল্লী, ১৮ আগষ্ট। কেন্দ্ৰীয় তথ্য আৰু সম্প্ৰচাৰ মন্ত্ৰালয়ে বৃহস্পতিবাৰে তথ্য প্ৰযুক্তি নিয়ম–২০২১ৰ অধীনত ভাৰতৰ ৰাষ্ট্ৰীয় সুৰক্ষা, বৈদেশিক সম্পৰ্ক আৰু ৰাজহুৱা শৃংখলা সম্পৰ্কীয় প্ৰচাৰৰ বাবে আঠটাকৈ ইউটিউব চেনেল বন্ধ কৰে।

বন্ধ কৰা চেনেলবোৰৰ ভিতৰত ৭ টা ভাৰতীয় আৰু ১ টা পাকিস্তানী ইউটিউব চেনেল আছে। এই ইউটিউব চেনেলবোৰৰ ১১৪ মিলিয়নতকৈও অধিক দৰ্শক আৰু মুঠ ৮৫ লাখ ৭৩ হাজাৰ চাবস্ক্ৰাইবাৰ আছে। প্ৰতিবেদন অনুসৰি, কেন্দ্ৰই বন্ধ কৰা ইউটিউব চেনেলবোৰৰ পৰা ভুৱা ভাৰত বিৰোধী সমল নিৰীক্ষণ কৰা হৈছিল। ইয়াৰ ভিতৰত আছে ১২.৯০ লাখ চাবস্ক্ৰাইবাৰৰ সৈতে লোকতন্ত্ৰ টিভি, ইউ এণ্ড ভি টিভি, এম ৰাজভি, গৌৰৱময় পৱন মিথিলাঞ্চল, চিটিঅ'পি ৫টিএইচ, চৰকাৰী আপডেট আৰু এভৰিথিং ৱাচ চেনেল। ইয়াৰ লগতে এটা পাকিস্তানী চেনেল নিউজ ৱৰ্ল্ডো বন্ধ কৰা হৈছে। এই সকলোবোৰ চেনেলৰ চাবস্ক্ৰাইবাৰ লাখৰ ঘৰত আছে।