ડીસામાં યુવક છરા સાથે ઝડપાયો, જાહેરનામા ભંગ બદલ ફરિયાદ નોંધાઈ..

ડીસા શહેર ઉત્તર પોલીસ સ્ટેશન વિસ્તારમાં પેટ્રોલિંગ દરમિયાન એક યુવકને અણીદાર છરા સાથે ઝડપી પાડવામાં આવ્યો છે, તેની સામે જાહેર નામા ભંગ બદલ ડીસા ઉત્તર પોલીસ મથકે ફરિયાદ નોંધવામાં આવી છે..

પોલીસ હેડ કોન્સ્ટેબલ પ્રવીણભાઈ અને તેમની ટીમ ડીસા સ્પોર્ટ ક્લબ પાસે પેટ્રોલિંગ કરી રહી હતી, તે સમયે એક શંકાસ્પદ ઈસમ નજરે પડ્યો હતો, પોલીસે તેને રોકીને પૂછ પરછ અને ઝડતી તપાસ કરતા તેની કમરના ભાગેથી અણીદાર છરા જેવું હથિયાર મળી આવ્યું હતું..

યુવકે છરા અંગે કોઈ સંતોષકારક જવાબ આપ્યો ન હતો, બનાસકાંઠા જિલ્લા મેજિસ્ટ્રેટ ના જાહેરનામા નંબર ડી/એમએજી/1/જાના-48/વશી/1559-1572/2026, તારીખ 28/04/26 નો ભંગ થતો હોવાથી પોલીસે બે પંચોને બોલાવી કાર્યવાહી હાથ ધરી હતી, પંચો રૂબરૂ પૂછ પરછ કરતા યુવકે પોતાનું નામ દશરથભાઈ બળદેવભાઈ ઠાકોર (ઉંમર 25, ધંધો: રીક્ષા ડ્રાઈવિંગ, રહે. ડીસા, નહેરૂનગર, મેલડી માતાના મંદિર પાસે) જણાવ્યું હતું..

મળી આવેલો છરો આશરે એક ફૂટ લાંબો હતો, જેમાં આઠ ઇંચથી વધુનો ભાગ અણીદાર હતો અને બાકીનો ભાગ હાથાનો હતો, પોલીસે છરો કબજે કર્યો હતો, દશરથભાઈ ઠાકોર વિરુદ્ધ ભારતીય ન્યાય સંહિતા-2023 ની કલમ-223 અને ગુ.પો. અધિનિયમની કલમ 135 હેઠળ જાહેરનામા ભંગ અને ગેરકાયદેસર હથિયાર રાખવા બદલ કાયદેસર ની કાર્યવાહી કરવામાં આવી છે..