પાવીજેતપુર: સ્થાનિક સ્વરાજ્યની ચૂંટણીને લઈ પોલીસ એક્શન મોડમાં; નગરમાં ફૂટ પેટ્રોલિંગ અને જવાનોને તાલીમ અપાઈ
રાજ્યમાં આગામી "સ્થાનિક સ્વરાજ્યની ચૂંટણી - ૨૦૨૬" નો જંગ જામવા જઈ રહ્યો છે, ત્યારે પાવીજેતપુર તાલુકામાં શાંતિપૂર્ણ અને ભયમુક્ત વાતાવરણમાં મતદાન સંપન્ન થાય તે માટે સ્થાનિક પોલીસ દ્વારા કમર કસવામાં આવી છે. ચૂંટણી દરમિયાન કાયદો અને વ્યવસ્થાની સ્થિતિ જળવાઈ રહે તે હેતુથી પોલીસ તંત્ર દ્વારા સઘન આયોજન હાથ ધરવામાં આવ્યું છે.
પાવીજેતપુર નગરના તમામ વિસ્તારોમાં પોલીસે ફૂટ પેટ્રોલિંગ હાથ ધર્યું હતું. ખાસ કરીને સંવેદનશીલ વિસ્તારો અને મુખ્ય બજારોની ગલીએ ગલીમાં જવાનોએ શિસ્તબદ્ધ રીતે માર્ચ કરી હતી. આ પેટ્રોલિંગનો મુખ્ય ઉદ્દેશ્ય પ્રજામાં સુરક્ષાનો અહેસાસ કરાવવાનો અને અસામાજિક તત્વોમાં ભય ફેલાવવાનો છે, જેથી ચૂંટણી પ્રક્રિયામાં કોઈ ખલેલ ન પહોંચે.
નોંધનીય છે કે, પાવીજેતપુરમાં તાલુકા પંચાયતની ૧૮ બેઠકો તેમજ જિલ્લા પંચાયતની ૪ બેઠકો માટે આગામી સમયમાં મતદાન થનાર છે. આટલી મોટી સંખ્યામાં બેઠકો પર ચૂંટણી યોજાવાની હોવાથી પોલીસ દ્વારા અત્યારથી જ વ્યૂહાત્મક ગોઠવણ કરવામાં આવી છે.
ચૂંટણીને સુચારૂ રીતે પાર પાડવા માટે પાવીજેતપુર પોલીસ સ્ટેશન ખાતે પોલીસ માટે એક વિશેષ તાલીમ શિબિરનું પણ આયોજન કરવામાં આવ્યું હતું. જેમાં પોલીસ કર્મચારીઓને ચૂંટણી દરમિયાન નિભાવવાની નૈતિક અને કાયદાકીય ફરજો, બૂથ સ્તરે કાયદો અને વ્યવસ્થા જાળવવાની પદ્ધતિઓ, આચારસંહિતાનું ચુસ્ત પાલન કેવી રીતે કરાવવું, કોઈપણ અનિચ્છનીય ઘટના સમયે ત્વરિત પ્રતિસાદ આપવાની ક્ષમતા અંગે માર્ગદર્શન વિસ્તારથી આપવામાં આવ્યું હતું.
પાવીજેતપુર પોલીસના આ સુંદર અને આગોતરા આયોજનને પગલે સ્થાનિક રહીશોમાં પણ સંતોષ જોવા મળી રહ્યો છે. પોલીસ તંત્ર દ્વારા સ્પષ્ટ સંકેત આપવામાં આવ્યો છે કે શાંતિ ડહોળવાનો પ્રયાસ કરનાર સામે કડક હાથે કાર્યવાહી કરવામાં આવશે.
