બનાસકાંઠા રેન્જ પોલીસે પાલનપુર હાઈવે પરથી દારૂ ઝડપ્યો..

ટ્રકમાંથી 662 પેટી વિદેશી દારૂ, કુલ 91.52 લાખનો મુદ્દામાલ જપ્ત..

બનાસકાંઠા રેન્જ પોલીસે પાલનપુર શહેર પોલીસ સ્ટેશન વિસ્તારમાંથી ભારતીય બનાવટના વિદેશી દારૂની મોટી હેરાફેરી ઝડપી પાડી છે, પોલીસે કુલ 91,52,160 રૂપિયાનો મુદ્દામાલ જપ્ત કર્યો છે, જેમાં 66,32,160 રૂપિયાનો દારૂનો જથ્થો સામેલ છે, આ કાર્યવાહીમાં એક ઇસમને પણ પકડી પાડવામાં આવ્યો છે..

આ કાર્યવાહી પોલીસ મહાનિરીક્ષક પરિક્ષીતા રાઠોડ, બનાસકાંઠા રેન્જ, પાલનપુર ની સૂચના હેઠળ કરવામાં આવી હતી, સ્થાનિક સ્વરાજ્યની ચૂંટણીઓ મુક્ત અને ન્યાયિક વાતાવરણમાં યોજાય તે સુનિશ્ચિત કરવા માટે રેન્જના જિલ્લાઓમાં પરપ્રાંતિય વિદેશી દારૂની હેરફેર કે વેચાણ કરનારા ઇસમો વિરુદ્ધ કડક કાર્યવાહી કરવાના આદેશ આપવામાં આવ્યા હતા..

પોલીસ સબ ઇન્સપેક્ટર એસ.જે. પરમાર, બનાસકાંઠા રેન્જના માર્ગદર્શન હેઠળ પોલીસ સ્ટાફને મળેલી સચોટ બાતમીના આધારે પાલનપુર હાઇવે પર એરોમા સર્કલ પાસે નાકાબંધી ગોઠવવામાં આવી હતી, આ દરમિયાન GJ-18-BW-5348 નંબર ના આઇસર ટ્રકનું ચેકિંગ કરવામાં આવ્યું હતું..

ટ્રકની તપાસ કરતા, તેમાં પ્લાસ્ટિકના કટ્ટાઓમાં ભરેલા ભુસાની આડમાં પતરા નું પાર્ટેશન બનાવી અલગ-અલગ બ્રાન્ડની ભારતીય બનાવટની વિદેશી દારૂની 662 પેટીઓ છુપાવવામાં આવી હતી. આ પેટીઓમાં કુલ 28,308 બોટલ/ટીન દારૂ હતો, જેની કિંમત 66,32,160 રૂપિયા આંકવામાં આવી છે..

આ દારૂની હેરાફેરીમાં જોગારામ રાવ (રહે. બાયતુ, જિ. બાડમેર, રાજસ્થાન) નામના ઇસમને પકડી પાડવામાં આવ્યો છે. આ ઉપરાંત, ગુજરાત રાજ્યમાં વિદેશી દારૂ ઘુસાડવાના આ ષડયંત્રમાં સામેલ અન્ય પાંચ ઇસમોને વોન્ટેડ જાહેર કરવામાં આવ્યા છે, પાલનપુર શહેર પશ્ચિમ પોલીસ સ્ટેશન માં આ અંગે કાયદેસરની કાર્યવાહી હાથ ધરવામાં આવી છે..