শিৱসাগৰঃ --শিৱসাগৰত জিলা স্বাস্থ্য সমিতিৰ 'আশা' সন্মিলন সফলতাৰে সম্পন্ন হয়৷ আশাকর্মীসকলৰ অৱদান অতুলনীয়। চৰকাৰী সামান্য মাননীকে বিনা প্রতিবাদে গ্ৰহণ কৰি মানৱ সেৱাত অবিৰত দিন ৰাতি এক কৰি মহিলা আৰু শিশুৰ কল্যাণৰ বাবে যথেষ্ট কষ্ট আৰু ত্যাগ স্বীকাৰ কৰে এই আশাকৰ্মীসকলে। ২৪ ফেব্ৰুৱাৰী, মংগলবাৰে শিৱসাগৰ চহৰত অনুষ্ঠিত হয় এক 'আশা অভিৱৰ্তন'। শিৱসাগৰ জিলা প্ৰশাসন আৰু শিৱসাগৰ জিলা স্বাস্থ্য সমিতিৰ উদ্যোগত চহৰৰ মিলন মন্দিৰৰ ভৱনত জিলাৰ ৭৩৫ গৰাকী আশাকর্মী আৰু ৬৮ গৰাকী আশা ছুপাৰভাইজৰৰ সন্মিলনত আদৰণি ভাষণ দিয়ে জিলা স্বাস্থ্য বিভাগৰ যুটীয়া স্বাস্থ্য সেৱা সঞ্চালক ডাঃ মাখন কলিতায়ে । সন্মিলনত শিৱসাগৰ জিলাৰ জিলা আয়ুক্ত মৃদুল যাদৱ উপস্থিত থাকি 'আশা'সকলৰ কৰ্মৰাজিৰ প্রশংসা কৰি উৎসাহিত কৰে। আয়ুক্তৰ লগতে সম-জিলা আয়ুক্ত মীনাক্ষী পার্মে, অতিৰিক্ত আৰক্ষী অধীক্ষক উপস্থিত থকা সন্মিলনত জিলা স্বাস্থ্য সমিতিৰ তৰফৰ পৰা প্ৰতিটো খণ্ড প্রাথমিক স্বাস্থ্য কেন্দ্ৰৰ তিনিগৰাকীকৈ আশাকর্মীক শ্রেষ্ঠত্বৰ বঁটাৰে সন্মানিত কৰা হয়৷ অনুষ্ঠানত ২০২৩-২৪ বৰ্ষত "অসম গৌৰৱ" বঁটা লাভ কৰা আশাকৰ্মী মীনাক্ষী চেতিয়াই 'আশা'ৰ অনুভৱ ব্যক্ত কৰে ৷ এই অনুষ্ঠানত ডি পি এম ইউ আৰু বি পি এম ইউ ৰ প্ৰতিগৰাকী সদস্য উপস্থিত থকাৰ লগতে জিলা স্বাস্থ্য বিভাগৰ জ্যেষ্ঠ চিকিৎসকসকল উপস্থিত থাকে।
