শিৱসাগৰঃ== হাবিয়ে-বননিয়ে গজি উঠা বিভিন্ন বনৰীয়া কাঠফুলা খাই বিষক্রিয়া হোৱাৰ ঘটনা পৰিলক্ষিত হোৱাৰ প্ৰসঙ্গত শিৱসাগৰ জিলাবাসী ৰাইজক হাবি-বননিত পোৱা কাঠফুলা খোৱাৰ পৰা বিৰত থাকিবলৈ আহ্বান জনাইছে শিৱসাগৰ জিলাৰ জিলা আয়ুক্ত আয়ুস গৰ্গ, (I.A.S) ৰ লগতে স্বাস্থ্য বিভাগৰ যুটীয়া স্বাস্থ্যসেৱা সঞ্চালক ডাঃ মাখন কলিতাই ।উল্লেখযোগ্য যে, বাৰিষা কালত সহজে বাটে-ঘাটে, হাবি-বননিয়ে উপলব্ধ হোৱা কাঠফুলাত বিভিন্ন ক্ষতিকাৰক বিষাক্ত পদার্থ থাকে আৰু সেৱনৰ দ্বাৰা মৃত্যু পর্যন্ত হয় । এই বিষাক্ত কাঠফুলা খোৱাৰ ফলত পেটৰ বিষ, বমি, পনীয়া শৌচ, মূৰৰ বিষ আৰু জ্বৰৰ দৰে বিভিন্ন লক্ষণে দেখা দিয়ে । যদিহে কোনো ব্যক্তিয়ে বিষাক্ত কাঠফুলা খোৱা বুলি সন্দেহ কৰে, তেন্তে উল্লেখিত উপসর্গসমূহ দেখা দিয়া লৈ অপেক্ষা নকৰি অনতিপলমে নিকটতম স্বাস্থ্য কেন্দ্ৰৰ সৈতে যোগাযোগ কৰিবলৈ স্বাস্থ্য বিভাগৰ তৰফৰ পৰা আহ্বান জনোৱা হৈছে । ইতিমধ্যে স্বাস্থ্য বিভাগৰ তৰফৰ পৰা বিষাক্ত কাঠফুলা সেৱনৰ বিৰুদ্ধে যোৱা এপ্ৰিল মাহৰ আৰম্ভণিৰে পৰা বিভিন্ন সজাগতামূলক কাৰ্যসূচী গ্ৰহণ কৰি আহিছে যদিও জিলাখনত বিষাক্ত কাঠফুলা খাই মৃত্যু হোৱা লোকৰ সংখ্যা বৰ্তমানলৈকেও হ্ৰাস হোৱা নাই বুলি ৰাইজে ক’ব খোজে ৷ ইতিমধ্যে কেইবাটাও চাহ বাগিছা অধ্যুষিত অঞ্চলত বিষাক্ত কাঠফুলা ভক্ষণ কৰি কেইবাজনো লোক বিষক্ৰিয়াত আক্ৰান্ত হোৱাৰ পৰিপ্ৰেক্ষিতত জিলা স্বাস্থ্য বিভাগৰ অতিৰিক্ত আয়ুক্ত মীনাক্ষী পাৰ্মেয়ে দুঃখ প্ৰকাশ কৰাৰ লগতে বিষাক্ত কাঠফুলা সেৱন নকৰিবলৈ জিলাবাসী ৰাইজক কাতৰে আহ্বান জনাইছে।
