ગુજરાત સરકારે રાજ્યભરમાં અસામાજિક તત્વો સામે શરૂ કરેલી ઝુંબેશ અંતર્ગત ડીસા તાલુકા પોલીસે મહત્વનું પગલું ભર્યું છે. પોલીસે 17 અસામાજિક તત્વોની યાદી તૈયાર કરી છે. આ તમામ શખ્સો ડીસા રૂરલ પોલીસ સ્ટેશન વિસ્તારના ગામોમાં રહે છે અને ગુનાહિત ઇતિહાસ ધરાવે છે.

ડીસા તાલુકા પોલીસ ઇન્સ્પેક્ટરે તાલુકા વિકાસ અધિકારીને પત્ર લખ્યો છે. તેમાં ગ્રામ પંચાયતના તલાટી કમ મંત્રીઓ પાસેથી આ તત્વોની ગેરકાયદેસર મિલકતો અને દબાણોની માહિતી માંગી છે. પોલીસનું માનવું છે કે આ માહિતી મળવાથી અસામાજિક પ્રવૃત્તિઓ સામે વધુ અસરકારક કાર્યવાહી થઈ શકશે.

તાલુકા વિકાસ અધિકારીને વિનંતી કરવામાં આવી છે કે, તેઓ તલાટી કમ મંત્રીઓને તાત્કાલિક માહિતી તૈયાર કરવાનો આદેશ આપે. જો કોઈ ગેરકાયદેસર દબાણ મળી આવશે તો પોલીસ કાયદેસરની કાર્યવાહી કરશે. આ પગલાંથી વિસ્તારમાં કાયદો અને વ્યવસ્થાની સ્થિતિ વધુ મજબૂત બનશે.