শিৱসাগৰঃ শিৱসাগৰ জিলাৰ মৰনৈকিনাৰত মাছৰ সুষম খাদ্য প্ৰস্তুত কৰা উদ্যোগ এটি উদ্বোধন কৰে জিলা আয়ুক্তই ৷ আজি শিৱসাগৰ জিলাৰ আয়ুক্ত আদিত্য বিক্ৰম যাদৱে জিলাখনৰ মৰনৈকিনাৰ অঞ্চলত শিৱসাগৰ জিলা মীন বিভাগৰ দ্বাৰা প্ৰধানমন্ত্ৰী মৎস্য সম্পদ যোজনাৰ ২০২১-২২ বৰ্ষৰ অধীনত নতুনকৈ স্থাপিত হোৱা মাছৰ সুষম খাদ্য প্ৰস্তুত কৰা উদ্যোগৰ শুভ উদ্বোধন কৰে । দিনৰ প্ৰায় ১১ বজাত অনুষ্ঠিত হোৱা উদ্বোধনী অনুষ্ঠানত উদ্যোগৰ স্বত্বাধিকাৰী অনিল চন্দ্ৰ গামে আয়ুক্তক এখন ফুলাম গামোচাৰে আদৰণি জনোৱাৰ পাছতেই অনুষ্ঠানত শিৱসাগৰ জিলা মীন উন্নয়ন বিষয়া জ্যোতি প্ৰভাত দুৱৰাই উদ্যোগটি স্থাপন কৰা লক্ষ্য আৰু উদ্দেশ্যৰ বিষয়ে আয়ুক্তক অৱগত কৰে। জিলা আয়ুক্ত যাদৱে তেওঁৰ বক্তব্যত এই উদ্যোগৰ পৰা স্থানীয় মীন পালক যথেষ্ঠ লাভাম্বিত হোৱাৰ আশা ব্যক্ত কৰে আৰু উদ্যোগৰ বাবে প্ৰয়োজনীয় কেঁচামালসমূহ স্থানীয়ভাৱে সংগ্ৰহ কৰি তাৰ পৰা উৎপাদন কৰা উচ্চ প্ৰ'টিনযুক্ত মাছৰ সুষম খাদ্য কম মূল্যত যাতে মীন পালক সকলে লাভ কৰে সেই সন্দৰ্ভত বহলভাৱে পৰামৰ্শ প্ৰদান কৰে । আনহাতে মাছৰ খাদ্য প্ৰস্তুত কৰা প্ৰক্ৰিয়া সম্পৰ্কে কাৰিকৰী বাখ্যা দাঙি ধৰে শিৱসাগৰ উন্নয়ন খণ্ডৰ মীন উন্নয়ন বিষয়া অভিনন্দন কাশ্যপে । শিৱসাগৰ জিলা কৃষি বিভাগৰ সহকাৰী সঞ্চালক অমৃত শইকীয়াই অনুষ্ঠানত উপস্থিত থাকি উদ্যোগৰ বাবে প্ৰয়োজনীয় কেঁচা মাল স্থানীয়ভাৱে উৎপাদন কৰাৰ বাবে কৃষি বিভাগৰ ফালৰ পৰা সকলো ধৰণৰ সহযোগিতাৰ আশ্বাস দিয়ে । অনুষ্ঠানত নাজিৰা উন্নয়ন খণ্ডৰ মীন বিষয়া ভৃগু দেৱান, মীন প্ৰদৰ্শক বিপ্লব কৰ আৰু মৎস্য মিএ ইমতিয়াজ হুছেইন উপস্থিত থাকে।
