આમ આદમી પાર્ટી (AAP)ના રાષ્ટ્રીય કન્વીનર અરવિંદ કેજરીવાલ બુધવારે ગુજરાત પહોંચશે અને રાજ્યના લોકો માટે બીજી યોજનાની જાહેરાત કરશે. AAPના એક વરિષ્ઠ નેતાએ આ જાણકારી આપી. ગુજરાતમાં આ વર્ષના અંતમાં વિધાનસભાની ચૂંટણી યોજાવાની છે. AAPના રાષ્ટ્રીય સંયુક્ત મહાસચિવ ઇસુદાન ગઢવીએ મંગળવારે પત્રકારોને જણાવ્યું હતું કે દિલ્હીના મુખ્યમંત્રી તેમની એક દિવસીય મુલાકાત દરમિયાન અમદાવાદમાં બેઠક કરશે.

ગઢવીએ જણાવ્યું હતું કે નવી યોજનાથી ગુજરાતના “2.5 કરોડ લોકોને” ફાયદો થશે, જેની જાહેરાત રક્ષાબંધન પહેલા કરવામાં આવશે. કેજરીવાલ ગયા સપ્તાહમાં ગુજરાતની મુલાકાતે પણ આવ્યા હતા. રાજ્યમાં પોતાની પાર્ટીની સ્થાપના કરવાની રણનીતિના ભાગરૂપે તેઓ એક પછી એક અલગ-અલગ જિલ્લાઓમાં પ્રવાસ કરી રહ્યા છે. ગુજરાતમાં ભારતીય જનતા પાર્ટી (BJP)નું શાસન છે અને રાજ્યના રાજકારણમાં ભાજપ અને કોંગ્રેસનું વર્ચસ્વ છે.

ગઢવીએ જણાવ્યું હતું કે કેજરીવાલ દ્વારા અગાઉ કરાયેલી મફત વીજળીની જાહેરાતથી લોકોમાં ભારે ઉત્સાહ જોવા મળી રહ્યો છે. ભાજપના કાર્યકરો પણ આનાથી ઉત્સાહિત છે અને પૂછી રહ્યા છે કે ભાજપ સરકારે તેમને (ગુજરાતના લોકોને) આવી રાહત કેમ ન આપી?

ગઢવીએ કહ્યું કે ભારતીય જનતા પાર્ટી (ભાજપ) આવી ‘ગેરંટી’થી ડરે છે. તેમણે દાવો કર્યો હતો કે તેઓ આવા રાહતના પગલાં સામે સુપ્રીમ કોર્ટમાં ગયા છે. તેઓ રાજકીય પક્ષો દ્વારા ચૂંટણી પૂર્વેની જાહેરાતો અંગે સર્વોચ્ચ અદાલતમાં દાખલ કરાયેલી અરજીનો ઉલ્લેખ કરી રહ્યા હતા. AAP વડાએ ગયા શનિવાર અને રવિવારે તેમની બે દિવસીય મુલાકાત દરમિયાન જામનગરના બોડેલી અને છોટા ઉદેપુરની મુલાકાત લીધી હતી.

કેજરીવાલે રવિવારે ગુજરાતના આદિવાસીઓ માટે જણાવ્યું હતું કે રાજ્યના આદિવાસી વિસ્તારોમાં બંધારણની પાંચમી અનુસૂચિ અને પંચાયત સુધારણા (અનુસૂચિત ક્ષેત્રોમાં વિસ્તરણ) અધિનિયમ લાગુ કરવામાં આવશે. કેજરીવાલે બેરોજગાર યુવાનોને નોકરી આપવાની અને નોકરી ન મળે ત્યાં સુધી દર મહિને 3,000 રૂપિયાનું ભથ્થું આપવાની બાંયધરી પણ આપી છે. ગયા મહિને સુરતમાં કરાયેલી જાહેરાતમાં કેજરીવાલે કહ્યું હતું કે જો રાજ્યમાં સરકાર બનશે તો તેમની પાર્ટી લોકોને દર મહિને 300 યુનિટ સુધી મફત વીજળી આપશે.