દસાડા પીએસઆઇ સહિતના પોલીસ સ્ટાફે બાતમીના આધારે છટકું ગોઠવી દસાડા શંખેશ્વર હાઇવે પર પાનવા ગામના બોર્ડ પાસેથી વિદેશી દારૂની 658 બોટલો સાથે કાર ઝડપી પાડી હતી. આ દરોડામાં દસાડા પોલીસે વિદેશી દારૂની બોટલો અને ઇકો કાર મળી કુલ રૂ. 3,80,375ના મુદામાલ સાથે એક શખ્સને ઝબ્બે કરી કાર્યવાહી હાથ ધરી છે.દસાડા પીએસઆઇ વી.આઇ.ખડીયા સહિતના પોલીસ સ્ટાફને અગાઉથી મળેલી ચોક્કસ બાતમીના આધારે પેટ્રોલિંગ દરમિયાન દસાડા શંખેશ્વર હાઇવે પર પાનવા ગામના બોર્ડ પાસે છટકું ગોઠવ્યું હતુ. ત્યારે હાઇવે પર શંકાસ્પદ હાલતમાં નિકળેલી સફેદ કલરની ઇકો ગાડીનં-GJ-09-BK-5776 વાળીને કોર્ડન કરીને ઉભી રખાવીને ગાડી સાથે ચાલકની સઘન તલાશી લીધી હતી. દસાડા પોલીસ આ ગાડીમાંથી ચાલક દિનેશકુમાર હિરારામ ભીલ, ( રહે-દુથ્વા, તા. ચીતલવાના, જી. જાલોર ( રાજસ્થાન )ને જુદી જુદી બ્રાન્ડની વિદેશી દારૂની બોટલો,નાના ચપલા અને બિટર ટીન મળી કુલ બોટલો નંગ- 658 કિંમત રૂ. 80,375 અને ઇકો ગાડી કિંમત રૂ. 3,00,000 મળી કુલ રૂ. 3,80,375ના મુદામાલ સાથે ઝબ્બે કરી ઇંગ્લિશ દારૂ અંગેનો ગુન્હો દાખલ કરી કાર્યવાહી હાથ ધરી છે. દસાડા પોલીસના આ દરોડામાં પીએસઆઇ વી.આર.ખડીયા, હમિરભાઇ, વિજયસિંહ, મનીષભાઇ અઘારા, સુરેશભાઇ, નિલેશભાઇ રથવી, દિપકભાઇ અને ચેહરભાઇ સહિતનો દસાડા પોલીસ સ્ટાફ સાથે હાજર હતો. આ કેસની વધુ તપાસ દસાડા પીએસઆઇ વી.આર.ખડીયા ચલાવી રહ્યાં છે.