•  ફિલ્મનું ટાઈટલ બદલીને અગ્નિ કરી દેવાયું
•  રઈસ ના ડાયરેક્ટરની મુંબઈના ફાયર ફાઈટર પરની ફિલ્મ લાંબા સમયથી અટકી પડી હતી

ગુજરાતના ડોન લતીફની જિંદગી પરથી શાહરુખ ખાનની મુખ્ય ભૂમિકા સાથેની રઈસ ફિલ્મ બનાવનારા ડાયરેક્ટર રાહુલ ધોળકિયાની મુંબઈના ફાયર ફાઈટર પરની ફિલ્મ લાંબા સમયથી અટકી પડી હતી. હવે આ ફિલ્મનો પ્રોજેક્ટ પુનઃ પાટે ચઢ્યો હોવાનું કહેવાય છે.

ફિલ્મમાં કેટલાક ફેરફારો પણ થયા છે. અગાઉ આ ફિલ્મનું ટાઈટલ કામચલાઉ રીતે 'ફાયર' નક્કી કરાયું હતું. તે બદલીને હવે અગ્નિ કરી દેવામાં આવ્યું છે. આ ઉપરાંત ફિલ્મની મુખ્ય ભૂમિકા અગાઉ સૈફ અલી ખાન નિભાવવાનો હતો તેને બદલે હવે મુખ્ય રોલ પ્રતીક ગાંધી કરશે આ ઉપરાંત દિવ્યેન્દુ શર્મા પણ મહત્વની ભૂમિકામાં હશે.

મુંબઈના એક ફાયરમેન દ્વારા કેવી રીતે ભીષણ આગ વચ્ચે કટોકટીના સંજોગોમાં કામગીરી બજાવવામાં આવી હતી તેના પર આ ફિલ્મની વાર્તા હોવાનું કહેવાય છે. સૈફ અલી ખાને આ ભૂમિકા કરવામાં ભારે ઉત્સાહ દાખવ્યો હતો. જોકે, સૈફ અલી ખાનની તારીખો મળવામાં વિલંબ થતાં અને કોવિડ પછીના સંજોગોના કારણે આ પ્રોજેક્ટ ઉત્તરોત્તર લંબાઈ ગયો હતો.

આ ફિલ્મ સ્ક્રિપ્ટ રાહુલ ધોળકિયા તથા વિજય મોર્યાએ લખી હોવાનું જાણવા મળે છે. જોકે, પ્રોડયુસર તરીકે ફરહાન અખ્તરે પણ તેમાં ક્રિએટિવ ઈનપૂટ આપ્યા હોવાનું કહેવાય છે.